17. 01.2020 -ci il tarixində liseydə Təhsil Nazirliyinin müvafiq əmri ilə təsdiqlənmiş “20 Yanvar faciəsinin otuzuncu ildönümü ilə bağlı Təhsil Nazirliyinin Tədbirlər Planı”na əsasən, şagirdlərdə Vətənə məhəbbət hissinin daha da möhkəmləndirilməsi, onların layiqli vətəndaş kimi yetişdirilməsinə xidmət edən “20 Yanvar- Qərəmanlıq salnaməsi” mövzusunda dərslər keçirildi.
Daha sonra liseyin 11-ci sinif şagirdlərinin və müəllim kollektivinin işrtirakı ilə 20 Yanvar faciəsinin otuzuncu ildönümünə həsr olunmuş toplantıda 20 Yanvar faciəsini əks etdirən videofilm nümayiş etdirildi. Toplantıda iştirak edən şagirdlərin hazırladıqları çıxışlar tariximzin qan yaddaşının heç bir zaman unudulmayacağına bariz nümunə idi. O dəhşətli günün canlı şahidlərindən olan liseyin fizika müəllimi Hədiyyə Qənbərova öz xatirələrini şagirdlərlə bölüşdü. Tarix müəllimi Pərviz Ağalarov öz çıxışında şagirdləri maraqlandıran sualları cavablandırdı.
Toplantının sonunda liseyin direktoru Mehriban Vəliyeva çıxış edərək qeyd etdi ki, biz şəhidlərimizi xatırlayarkən kədər hissi ilə yanaşı qürur hissi də duymalıyıq. Çünki belə övladları olan Vətən heç vaxt məğlub olmaz.
Toplantıdan sonra liseyin şagird və müəllim kollektivi şəhidlər qarşısında mənəvi borcunu ödəmək , şəhidlərimizin xatirəsini yad etmək üçün Şəhidlər Xiyabanına yürüş etdi.
